كـــۆنـــگـــرە و نـــوێـــبـــوونـــەوە/نه‌زهه‌ت حالی

یەکێک لە بنەماکانی کاری حزبایەتی، ئەوەیە کە لەگەڵ دروستبوونی حزب و هاتنی بۆ ناو کایەی سیاسی، بەستنی کۆنگرە دەبێتە پێویستییەکی بنەڕەتی. لە كۆنگرەدا بڕیار لەسەر ناو و پێڕۆ و پڕۆگرام و بەرنامەی كاری داهاتوو دەدرێت و لە هەمان كاتیشدا لە پڕۆسەیەكی دیموكراتیدا سەركردایەتیی ئەو حزبە یان ئەو ڕێکخراوە هەڵدەبژێردرێت. كەواتە بۆ ئەوەی حزب و ڕێكخراوەکان لە گۆڕەپانی کاری سیاسی و كۆمەڵایەتیدا وجوودێكی چالاك و بەرهەمهێنیان هەبێت، هەروەها لە پێناو مانەوە و نوێبوونەوەیان، پرسی ئەنجامدانی کۆنگرە بە شێوەیەكی دەوری و بەردەوام بە پێویستییەكی سەرەكی دەژمێردرێت.
گرنگیی ئەنجامدانی كۆنگرە بۆ هەر حزب و ڕێكخراوێكی سیاسی لەوەدایە كە دەتوانن لە ڕێگەی کۆنگرەوە هەڵسەنگاندنی كاری ڕابردووی خۆیان و دۆخی هەنووكەییان بكەن و بەرنامەی نوێ بۆ داهاتوو و بەشداریی کارایان دابڕێژن و خۆیان لەگەڵ ئەو گۆڕانكارییانەدا بگونجێنن كە لە ژینگەی سیاسیی ناوخۆ و دەوروبەریاندا لە ماوەی نێوان بەستنی کۆنگرەدا ڕوویان داوە و گۆڕانكاری لە بەرنامە و پلانی كاریان بەو ئاڕاستەیە بێت كە هێزی جەماوەر و توانا و مەشرووعییەتی سیاسییان لە ناوخۆ و لە ئاستی نێودەوڵەتیدا زیاد بكات و زیاتر خۆیان لەگەڵ پرەنسیپەكانی سەردەمدا بگونجێنن و لە هەمان كاتدا هەوڵی بەدیهێنانی داواكارییەكانی جەماوەر بدەن. لە هەر كۆنگرەیەكیشدا دەرگە بەرەوڕووی كەسانی نوێ و شاییستە دەكرێتەوە بۆ ئەوەی لە سەركردایەتیدا ڕۆڵی خۆیان ببینن.
كۆنگرە ناوەندێكی دیموكراتییانەی بڕیاردەر و بزوێنەر و ئەڵقەی پێوەندیی نێوان ڕابردوو و داهاتوویە، بە شێوەیەك كە هزر و بەرنامەی نوێ لەگەڵ بەرنامە و هزر و ئەزموونی كۆن ئاوێتە دەبن. گەر بە دیدی دیالیكتی بڕوانینە ئەو پڕۆسەیە، دەبینین كە بەرهەمێكی نوێ و پێشكەوتووتری لێ دەردەکەوێت كە ئامادەیی زیاتری تێدایە بۆ ڕووبەڕووبونەوە لەگەڵ پێشهاتەكانی داهاتوو و برەودان بە ژیانی سیاسی ئەو پارتییە و درێژەدان و بەردەوامبوونی تەمەنی لە ژیانی سیاسیدا.
حزب و ڕێکخراوە سیاسییەکان گرنگترین و کاراترین پێکهاتەی کۆمەڵگەی مەدەنین، بەشدارییەکی ڕاستەوخۆ و کاریگەرتریان هەیە بەسەر ژیانی ئەندامانی کۆمەڵگە. بە پێی ڕاستییە سەلمێنراوەكانی زانستی كۆمەڵناسییش، هەر تاك و دەستە و گرووپێكی كۆمەڵایەتی، كاریگەریی لەسەر دەوروبەری خۆی هەیە و بە پێچەوانەوە دەوروبەریش كاریگەریی بەسەرەوە دەبێت. ڕاددەی كاریگەرییەكان دوو لایەنە بە پێی ئاستی توانا و پێگەی (كۆمەڵایەتی، ئابووری، مەعریفی، سیاسی) دەگۆڕێت، بێگومان كەسایەتی و پارتییە بەهێزەكان كاریگەریی زیاتر دروست دەكەن.
پارتیی دیموكراتی كوردستان كە لە ساڵی 1946ـەوە دامەزراوە، بە كۆنترین و كاریگەرترین پارتیی سیاسی دەژمێردرێت كە بە بەردەوامی تاكوو ئەمڕۆ لە گۆڕەپانی سیاسیی كوردستاندا بوونی هەیە. مێژووی پارتی، مێژووی زۆر لە سەركردە و كەسایەتییە سیاسییەكانی ئەمڕۆی كوردستان لەخۆ دەگرێت و زۆرێك لەوانەی ئێستا لە سەركردایەتیی حزب و ڕێكخراوە سیاسییەكانی كوردستاندا كار دەكەن، پێشتر لە ناو ڕێزەكانی ئەو حزبەدا یان لە یەكێك لە ڕێكخراوە جەماوەرییەكانیدا كاریان كردووە یاخود نەوەی ئەو كەسانەن كە پێشتر لە ناو پارتیدا كاریان دەكرد.
ئەنجامی هەڵبژاردنەكانی ئەمساڵی پەرلەمانی كوردستانیش، دەرخەری ڕاددەی بەهێزیی پارتی نیشان دەدات كە تا ئێستایش بەهێزترین حزبی جەماوەرییە لە گۆڕەپانی سیاسیی هەرێمی كوردستاندا، بۆیە نکۆڵی لەوە ناکرێت کە پارتی كاریگەریی زیاتری لەسەر ژیان و داهاتووی خەڵكی ئەو هەرێمە دەبێت. زۆرن ئەو كەسانەی لە ناو ڕێزەكانی ئەو پارتییەدا قوربانییان داوە و مێژووی خۆیان لە ناو ئەو حزبەدا دەبیننەوە. هەر ئەوەیش وا دەكات كە ئەو پارتییە بەردەوام لە ژێر چاودێریی خەڵكانێكدا بێت كە بە پەرۆشن بۆ ئاییندەی خۆیان و حزبەكەیان و لە هەمان كاتیشدا چاوەڕوانی ئەوە دەكەن كە پارتییەكەیان هەمیشە بە بەرنامەی باشتر و سەركەوتووتر لە ڕێزی پێشەوەدا بێت و لە ئاستی ئەو هەموو خەبات و قوربانیدانەی ئەندام و لایەنگرانی خۆیدا بێت.
ئەوەی كە پارتی دیموكرات لە پارتییەكانی دیكەی گۆڕەپانی سیاسیی كوردستان جیا دەكاتەوە و بە خاڵی بەهێزی ئەو پارتییە دەژمێردرێت، یەكڕێزیی و یەکگرتوویی ناو ئۆرگان و ڕێكخستنەكانی ئەو حزبە بووە، دیارە هۆكاری سەرەكیی ئەوەیش دەگەرێتەوە بۆ سەركردایەتیكردنی لە لایەن بنەماڵەیەكی شۆڕشگێڕ كە زیاتر لە 100 ساڵە لە پێناو دەستەبەركردنی مافی گەلی كورد و پێکهاتەکانی کوردستان خەبات دەكەن. سەرۆكی یەكەمی پارتی (مەلا مستەفا بارزانی)، لە مێژووی گەلی كورددا سەركردەیەكی بێوێنەیە كە لە كاتی سەرۆكایەتییەكەیدا نەک هەر زۆربەی هەرە زۆری گەلی كورد، بەڵکوو نەتەوەکانی دیكەیش ڕێبەرایەتیی (بارزانی)ـیان لا پەسەند بووە و (بارزانیی نەمر) هەمیشە خۆی بە خزمەتكاری گەل و نیشتیمانەكەی دادەنا. سەرۆكی دووەم و ئێستای (پارتی)ـیش (سەرۆك مەسعوود بارزانی) كە لە پێناو كوردایەتیدا هەر لە تەمەنی لاوێتییەوە تا ئێستا هەموو ژیانی خۆی بۆ ئەو ڕێبازە و دەستەبەركردنی مافەكانی هەموو چینوتوێژەکان تەرخان كردووە، خۆی بە پێشمەرگە و خزمەتكاری گەل و نیشتیمان دادەنێت.
سەركردایەتیكردنی پارتی لە لایەن بنەماڵەی (بارزانی)ـیەوە، خالێكی بەهێزە بۆ ئەو پارتییە و زۆرێك لە پارتییەكان (خەڵكی هەر شوێنێكی ئەو كوردستانە بن) زۆر جار بە ڕاشكاوانە دەڵێن كە لەبەر سەركردایەتیی بنەماڵەی (بارزانی) بوونەتە پارتی، چونكە لە مێژوو و خەباتی ئەو بنەماڵەیەوە ئومێدی سەرکەوتن و گەییشتن بە مافەکانمان زامن و مسۆگەرترە. هەڵوێستی ڕاشكاوانەی (بارزانیی نەمر) و (سەرۆك مەسعوود بارزانی) بەوەی كە خۆیان بە خزمەتكاری خەڵک دادەنێن، سەركردایەتی و كادیرەكانی پارتی ڕووبەڕووی ئیلتیزامی زیاتر دەكاتەوە و ناچاریان دەكات كە بە باوەڕ و بە كردار خزمەتكاری گەل و نیشتیمان بن.
پارتی هەمیشە ئەو ناوەندە بووە كە گشت چینوتوێژەكانی كۆمەڵگە بە جیاوازی، ئایینی، هزری، ئابووری (هەژار و دەوڵەمەند) و خاوەن ئایدیۆلۆژیا و ئایینی جیاواز لە ناو پارتیدا جێگەیان بووەتەوە و كاریان كردووە، چونكە لە باوەڕی ڕزگاریخوازی و نەتەوایەتی و شۆڕشێكی پاك و بێگەرد و سەركردایەتییەكی پەسەند كراودا یەك دەگرنەوە، هەروەها لە ڕووی جوگرافیشەوە توانیویەتی سنووری ناوچەگەرێتی ببەزێنێت و هەمیشە خەڵكی ناوچەی جیا جیا لە ناو پارتی و سەركردایەتیدا بوونیان هەبووە. بۆ نموونە، سكرتێرەكانی پارتی وەك (ئیبراهیم ئەحمەد، سلێمانی ـ هەمزە عەبدوڵلا ـ زاخۆیی، حەبیب محەممەد كەریم ـ فەیلی، عەلی عەبدوڵڵا ـ كۆیی)، واتە هیی ناوچە جیاوازەكانی كوردستان بوون. هەروەها هەر سێ سكرتێری مەکتەبی سیاسیی پارتی شەهید (سامی عەبدولڕحمان ـ شنگالی و جەوهەر نامیق ـ گەرمیانی) بوون و لە ئێستایشدا (فازڵ میرانی)ـیە کە خەڵكی دەڤەری زممارە. تەنانەت خەڵكی پارچەكانی دیكەیش لە ناو ڕێزەكانی پارتیدا هەبوونە و بۆ نموونەیش (د. محەممەد ساڵح جومعە). جگە لە نەتەوەی كوردیش، لە سەركردایەتیی پارتی و پۆستە باڵاکاندا، نەتەوەی دیكەیش بوونیان هەبووە و بە نموونەیش شەهید (فڕەنسۆ حەریری) و (ڕێبوار یەڵدا) كە ئاشوورین و لە ئایینەکانی دیكەی ناو نەتەوەی کوردیشدا کەسانی لە ئاستی سەرکردایەتی بە نموونەی (فەلەکەددین کاکەیی) و سەرکردەی قارەمانی وەکوو شەهید (مەحموود ئێزدی) هەبوونە. جیا لەمەیش، ئەم حزبە هەر لە سەرەتاوە باوەڕی بە بەشداری و ڕۆڵی ئافرەت هەبووە، (ناهیدە شێخ سەلام)ـی دایكی (د. ڕۆژ) کە لە شۆڕشی ئەیلوولدا لە سەركردایەتیی پارتی بوو و باشترین نموونەی ئەو ڕاستییەیە.
بەشداریی خەڵكی ناوچە جیاجیاكانی كوردستان و نەتەوەكانی دیكە و ئافرەتان لەسەر بنەمای توانا و لێهاتوویی و دڵسۆزی بۆ ڕێبازی پارتی و (بارزانی)، خاڵی بەهێز بوونە بۆ پارتی كە بێگومان لەو كۆنگرەیەیشدا و لە داهاتوویشدا گەر وەكوو پرنسیپ و بەهایەك سەیر بكرێن، هەروەكوو خاڵی بەهێز دەمێننەوە. ئەو بەشدارییە دەبێتە بەهێزبوونی ڕۆحی برایەتی و لاوازبوونی ڕۆحی ناوچەگەری. هەڵبژاردنی خەڵكی بەتوانای هەموو ناوچەكانی كوردستان، دەبێتە هۆی بەئاگابوونی ڕاستەوخۆی سەركردایەتی لە كێشە و گرفتی ناوچەكان و هۆکارێکە بۆ دروستكردنی پێوەندیی بەهێزتر لە نێوان سەركردایەتی و ئۆرگانەکانی خوارتردا، بە مەرجێك پێوەری هەڵبژاردنی ئەو کەسانە بریتی بن لە توانا و دڵسۆزی و ڕابردوویەكی پاك.
یەكێك لەو گۆڕانكارییانەی كە مەرجە لە كۆنگرەی ئەمجارەی پارتیدا لە بەرچاو بگیرێت، زیادكردنی ڕێژەی بەشداریكردنی ئافرەتانە لە پۆستی سەركردایەتیدا. بوونی ئافرەت بە ڕێژەیەكی بەرچاو لەو شوێنەدا دەبێتە هۆی بە ئاگابوونی زیاتری سەركردایەتیی حزبەكان لە كێشەكانی خێزان و پەروەردە و مافەكانی منداڵ و كێشەكانی تایبەت بە خودی ئافرەتان و ژیانی واقیعیی كۆمەڵایەتیمان بە گشتی، لە هەمان كاتیشدا دەرفەتێكی زیاتر بۆ ئافرەت دەڕەخسێنێت بۆ ئەوەی توانا شاراوەكانیان بە دیار بخەن و بەشداری لە بڕیارە چارەنووسسازەكاندا بكەن كە پێوەندیی بە چارەنووسی گشت كۆمەڵگەوە هەیە، نەك ئەوەی تەنیا پاشكۆی بڕیاری پیاوەكان بن.
هەروەها بابەتێكی دیكەی گرنگ كە پێویستە پارتی لە كۆنگرەی ئەمجارەیدا بڕیاری لەسەر بدات، گۆڕینی پێڕۆ و پڕۆگرامێتی بە پێڕۆ و پڕۆگرامێكی سەردەمییانە و گونجاو بۆ هەلومەرج و قۆناغی ئێستا و لە دوای كۆنگرەیش مەودای جێبەجێکردنی فاکتەرێک بێت بۆ ئەوەی هەموو پارتی وەكوو ئۆرگانێكی یەكگرتوو بە یەک ئاڕاستە كار بكەن و ڕێگە لە بڕیار و کردار بە مەزاجی شەخسی بگیردرێت.
هەروەها دوای كۆتاییهاتنی كۆنگرە، دەبێت پارتی بەرنامەیەكی چڕوپڕی هەبێت بۆ ڕووبەروبوونەوەی گەندەڵی، چونكە گەندەڵی هەڕەشەیەكی ڕاستەقینەیە و هەمیشە ڕووبەڕووی پارتییە دەستەڵاتدارەكان دەبێتەوە و كوردستانیش بەدەر نییە لەو ڕاستییە، هیچ پلان و ڕووبەڕووبوونەوەیەکیش ناهێتە واری جێبەجێکردنەوە تاكوو پێشوەختە ددانپێدانانێكی تەواو بەو دیاردەیە نەنرێت.
بە پێی پێناسە زانستییەكان، گەندەڵی دیاردەیەكە پێوەندیی بە كاری ئەو فەرمانبەر و بەرپرسانەوە هەیە كە لە ناو ئۆرگانەكانی حكوومەتدا كار دەكەن و کار و دەستەڵاتەکانیان بۆ وەدەستخستنی پارە و دەستکەوت لە سامانی گشتی بەكار دەهێنن.
ڕووبەڕووبوونەوەی ئەو دیاردەیە ئەستەم دەبێت گەر خودی سەركردایەتیی پارتییەكان چاودێریی بەرپرس و ئەندامانی خۆی نەكەن كە لە ناو حكوومەتدا ئەركی جیاوازیان پێ سپێردراوە. ئەمە ڕاستییەكی حاشاهەڵنەگرە كە لە سیستمی دیموكراسیدا و بە دوای كۆتاییهاتنی پڕۆسەی هەڵبژاردن، پارتی براوە لە هەڵبژاردنەكاندا، مافی خۆیەتی ژمارەیەكی زۆر لە پۆستی بەرپرسەكانی حكوومەت بە ئەندام و لایەنگرانی خۆی پڕ بكاتەوە، بۆ نموونە لە دەوڵەتە یەكگرتووەكانی ئەمەریكا، هەر پارتییەك كە دێتە سەر دەستەڵات، چەند هەزار پۆستی گرنگ ئاڵوگۆڕیان پێ دەكرێت، بەڵام دەبێت ئەوە لە بیر نەكەین كە گۆڕانكارییەكان لەسەر بنەمای توانا و شارەزایی و پسپۆڕییەوە ئەنجام دەدرێن و هەمیشە ئەو خەڵكانەیان هەیە كە ئەو پۆستانەیان پێ پڕ بكەنەوە و گەر نەیشیان بێت، بەرپرسی پێشوو لە شوێنی خۆیان دەهێلنەوە، ئەمەش بۆ ئەوەیە كە ئەو حزبە بتوانێت ئەجێندا و پلانی كاری كە لە هەڵبژاردندا ڕایگەیاندووە كاری لەسەر بكات. بە دڵنیاییشەوە پارتی هەمیشە کادیری بەتوانا و لێهاتووی هەیە بۆ هەموو ئاستەکان و بۆ جێبەجێکردنی ئەجێنداکانی.
لە دەوڵەتە خودان دامودەستگە دامەزراوەییەكاندا بەربەستی یاسایی و جێبەجێكاریی زۆر بۆ ڕێگەگرتن لە گەندەڵی هەیە کە لە وڵاتە تازەپێگەییشتووكاندا و وڵاتانی جیهانی سێیەم زۆر کارا نین، بۆیە لەو وڵاتانەدا لەبەر نەبوونی سیستمی دامەزراوەیی ڕاستەقینە، ئەو پارتییانەی كە باوەڕیان بە ڕووبەڕووبوونەوەی گەندەڵی هەیە، پێویستە لە ئاستی سەركردایەتیی حزب چاودێری و ڕێنمایی بەرپرسەكانی خۆیان بكەن لە شێوازی ئەدای كاریان بۆ ئەوەی تووشی دیاردەی گەندەڵی نەبن كە بە زیانی نەتەوە و نیشتیمان و خودی ئەو حزبەیش تەواو دەبێت. ئەو حزبانەیش لای خەڵك سەركەوتوو و خۆشەویستن كە دوودڵ نین لە ئەنجامدانی لێپرسینەوە و سزادانی كەسانی نابەرپرس و گەندەڵ كە ناووبانگی حزب و میللەتەكە دەزڕێنن و بە بێ دوودڵی گۆڕانكاریی پێویست ئەنجام دەدەن جا لە هەر ئاستێكدا بێت. هاوكات لەگەڵ ئەو هەنگاوانەن دەبێت لە هەوڵی گەشەپێكردنی كولتووری دژەگەندەڵیدا بین و کار بۆ ئەوە بکرێت کە بە شێوەی یاسایی و جێبەجێکاری، ڕێگە لە بڵاوبوونەوەی گەندەڵیی زیاتر بگیرێت.
بابەتێكی دیكەی هەستیار دەستنیشانکردن و دانانی كەسانێكە بۆ پۆستەكانی بەرپرسیارەتی لە ناو ئۆرگانەكانی حزب و حكوومەت و کاری پەرلەمانیدا، لێرەوە دەبێت بگوترێت کە پێشنیازکردن و دەستنیشانکردنی هەر کەسێک دەبێت لەسەر بنەمای دڵسۆزی و توانا و لێهاتوویی بێت، ئەوانەیشی کە بۆ ئەو پۆستانە هەڵدەبژێردرێن، پێویستە لەو باوەڕەوە کار بکەن کە لە ئەنجامی خزمەتکردن دەستکەوت و ئیمتیازاتیان پێ دەبەخشرێت، نەوەک بۆ دەستکەوت ئەو پۆستەیان پێ درابێت کە بە داخەوە خەریکە ئەمە ببێتە کولتوورێک و بۆ نەهێشتنی ئەم دیاردەیە پێویستیمان بە بڵاوکردنەوەی ئەو ڕۆشنبیرییە هەیە کە وەرگرتنی پۆست و پلە بۆ خزمەتی گشتییە و لە ڕێگەی ئەو خزمەتەوە پاداشت دەکرێن، نەوەک بۆ دەستکەوت و ئیمتیازات شوێن بۆ خەڵک بدۆزرێتەوە. لەو پێناوەیشدا پێڕۆكردنی هەردوو بنەمای كەسی شیاو بۆ شوێنی شیاو و لێپرسینەوە و پاداشت و سزا هەمیشە پارتی بە نوێی و بەهێزی دەهێلێتەوە، چونكە پارتی مێژوویەكی باش و پڕ لە دەستكەوت و جەماوەرێكی دڵسۆز و كادیری زۆر باش و سەرۆكێكی كوردپەروەر و خاوەن كاریزما و بە‌ئەزموونی هەیە.
سەبارەت بە ڕۆڵی پارتی وەكوو پارتییەكی كوردستانیی بەهێز، لە بەغدا پێویستە دوا بە دوای کۆنگرە، ئەدای کاری خۆی لە بە‌‌‌غدا چالاکانەتر بكات، بۆ ئەوەی پرسە‌ کێشەدارەكان‌ بە گفتوگۆ و هەوڵی سیاسییانەی جیددیتر چارە بکات. کاری زیاتر بۆ جێبەجێکردنی ماددەی 140 و گەڕاندنەوەی ناوچە دابڕێندراوەکان بۆ سەر هەرێمی کوردستان ئەنجام بدات وەک چۆن هەمیشە داکۆکیکار بووە لە مافە نەتەوەیی و بەرژەوەندییەکانی گەلی کوردستان.
لە هەمان كاتدا لە واقیعی ئێستای كوردستانیشدا چەند مەسەلەیەکی هەستیار دەبینرێن و بە پێویست دەزانرێت كە پارتی دوای كۆتاییهاتنی كۆنگرە، كاری لەسەر بكات کە ئەویش مەسەلەی وجوودی ڕای پێچەوانەیە یاخود دژەبۆچوونە. سەبارەت بەو پرسە گرنگە، بیرمەندی ئێرانی (د. سروش) ئاوا باسی دەكات كە دوو ڕەوت هەن کە یەکێکیان ڕای پێچەوانەیە (موخالەفەت)‌ و ئەوی دیكەیان دوژمناكارانە (عەداوەت)، ئەو پێی وایە كە لە ڕای پێچەوانەدا، عەقڵانییەت و لۆژیك بوونی هەیە، بەڵام لە دوژمنایەتیکردندا ناعەقڵانی بوون و سەرەڕۆیی دەبینرێت. هەروەها (سروش) دەڵێت: “من بە تەواوەتی پێشوازی لە ڕای جیاواز و پێچەوانەدا دەكەم، بەڵام دوژمنایەتی بۆ تەندروستیی فەرهەنگی كۆمەڵایەتی، بە خراپ و تێكدەر و وێرانكار دەزانم و هەموو هەوڵێك دەدەم بۆ ئەوەی خاڵی ناكۆكی نێوان خۆم و دوژمنەكەم بگۆڕم بۆ بیروڕای جیاواز، لەبەر ئەوەی لە‌گەڵ ڕاجیاوازەکاندا هەمیشە بواری یاریکردن هەیە، هەر نەبێت ئەوان ددان بە لایەنی بەرانبەردا دەنێن و حیساب بۆ بوونی دەکەن کە ئەمەیش مەرجی بەردەوامی یاریكردنەکەیە، بەڵام لە دوژمنایەتیكردندا كار بۆ لادانی لایەنی بەرانبەر دەکرێت بە شێوەیەك كە یارییەكە كۆتایی پێ بێت، بێگومان بیروڕا جیاوازییەکانیش دەبێت دادپەروەرانە و عاقڵانە مامەڵە لەگەڵ واقیعدا بكەن، نەك جیاوازیی بیروڕاكان لە پێناو وێرانكردنی كەسایەتیی بەرانبەر بەكار بهێندرێت”، كە بە داخەوە جیاوازی لە بیروڕا لە كۆمەڵگەی ئێمەدا خەریكە ئەو ئاڕاستەیە وەردەگرێت. كەواتە لە ژێر ڕۆشنایی هەستیاری ئەو بابەتەی لە سەرەوە ئاماژەمان پێ دا و بە هۆی قەبارە و هێز و كاریگەریی پارتی لە ئێستا و داهاتووی گەلی كوردستاندا پێویستە بە شێوازێكی زانستییانە هەڵسوكەوت لەگەل ئەو بابەتەدا بكات و ڕەوتی ناكۆكی و دوژمنایەتیکردنی بگوڕێت بۆ تەنیا جیاواز بوون لە ‌بیروڕادا. دەربازبوون لەو دۆخە ناتەندروستەیش بە كارێكی هەمەلایەنە دەكرێت كە هیچ لایەنێك لە كوردستان بە چاوی دوژمنكارانە سەیری ئەوی دی نەكات و دەرفەت بدرێت بە دەربڕینی ڕای جیاواز و (پارتی)ـیش لە مێژووی خۆیدا ڕێگر نەبووە لە بیروبۆچوونی سیاسیی جیاواز. دەربڕینی ڕای جیاوازیش دەبێت بە زمانێکی لۆژیکی و زانستی بێت بۆ ئەوەی کاریگەریی خۆی هەبێت لە باشترکردنی ئاستی ژیان و بژێوی و سیستمی حوکمڕانی کە لە هەمان کاتیشدا لایەنی وەرگر بە ئەرێنییەوە پێشوازی لێ بکات، چونكە بەرژەوەندیی هەموومان لە كاری باش و برایەتی و یەكڕێزیمان دایە و (پارتی)ـیش دەتوانێت هێزی نەرمی خۆی (Soft power) بەكار بهێنێت و زۆر بە ئاسانی بەو هێزە سەرنجڕاكێشییەی (قوە جازبیە)ـی كە هەیەتی، قەناعەت بە خەڵك بكات و پشتگیریی جەماوەر و تەنانەت لایەنە ناوخۆییەكانی عێراق و ناوچە و جیهانیش بۆ لای خۆی ڕابكێشێت لە پێناو دەستەبەرکردنی بەرژەوەندییە باڵاکانی کوردستان.